عين على القرآن وعين على الأحداث

في يوم ذكراك

موقع أنصار الله || أدب وشعر ||مهدي مفلح

 

في يوم ذكراك جدد شعبنا عهده

في كل ميدان يصنع نصره الموعود

 

يذيق الأشرار من زحفه ومن رده

والعود عادت وردينا جبال العود

 

يا صالح الدين شعبك ما انحنى مده

في كل موقف مشرف باذل المجهود

 

هم باغتيالك يلاقو الموت والشدة

وانت في ضيفة الله في هناء وخلود

 

ما مثل شعبك صدق في المعركة وحده

يلاقي الكفر ذي جمع عليه حشود

 

في الزحف يقدم وزحف المعتدي صده

ما هان عزمه ولا هادن عيال سعود

 

يفرش طريقه بسيفه من قدم هده

والحد خلاه يشعل ناره الموقود

 

صنديد عزمه وباسه من صلى جده

من يوم عاد الرسالة والنبي موجود

 

كانت جميع القبايل واقفة ضده

وهو مع الله يتحدى حشود حشود

 

واليوم عاد الزمن وابن اليمن وحده

يقارع الكفر بالكورنيت والبارود

 

لفو عليه المجامع ما انعطف زنده

بل عادت العاصفة في معركتهم نود

 

تتراجع اليوم هي واذيالها الوغدة

والكيد مثل السرابة واللقية سود

 

ما يصلح الله من قد حاق به حقده

يرجع بخزيه ويومه بالجزاء مشهود

 

اربع سنين انقضت والهدة الهدة

والحلف جرجر ذيوله والأمل مسدود

 

لو با يتابع سنينه ما ارتفع مجده

ولا حظي بانتصاره في بلاد الجود

 

كم ذا هزايم تناله ما رفع يده

يشتي النهاية ندمر عرشه الممدود

 

اكيد ما يشتي الناموس ما بده

لنه بلا دين والناموس له مفقود